HATAW! D'yaryo ng Bayan hatawtabloid.com
IBINALIK na sa kulungan sa senado ang kontratistang si Curlee Discaya pagkatapos isailalim sa operasyon ang kanyang balikat.
Mismong si Senate Secretary Mark Llandro Mendoza ang nagkompirma ng pagbabalik ni Discaya sa kulungan sa senado kasunod ang pagpapalabas ng larawan at video.
Tiniyak ni Mendoza na maayos ang kalagayan ni Discaya at pinayagan na siya ng kanyang mga doktor na ipagpatuloy ang pagpapagaling sa senado.
Magugunitang isang linggo na ang nakalilipas nang payagan ng senado na magtungo sa pagamutan si Discaya para sumailalim sa isang operasyon sa kanyang balikat.
Si Discaya ay mula noong Setyempre 2025 pa nakakulong sa senado matapos i-contempt ng Senate blue ribbon committee nang hindi nakontento ang mga miyembro ng komite sa kanyang mga sagot sa isinagawang pagdinig ng Blue Ribbon committee ukol sa maanomalyang flood control projects.
Mismong ang mga doktor ng senado ang nagbigay ng clearance kay Discaya para maoperahan nang irekomenda ng kanyang doktor.
Hindi tiyak kung hanggang kailan mananatili sa kulungan sa senado si Discaya lalo na’t inihayag ni Senador Panfilo “Ping” Lacson, Chairman ng komite, na wala pang katiyakan kung kailan muli magsasagawa ng pagdinig ang komite ukol sa isyu. (NIÑO ACLAN)
