HATAW! D'yaryo ng Bayan hatawtabloid.com
ni NIÑO ACLAN
IBINUNYAG ni Senate President Pro-Tempore Panfilo “Ping” Lacson at Chairman din ng Senate Blue Ribbon Committee na tumanggap ng P500 milyong allocable project si Senador Rodante Marcoleta.
Ayon kay Lacson, mayroon silang sulat-kamay ni dating Department of Public Works and Highways (DPWH) Undersecretary Maria Catalina Cabral na ibinigay ng kanyang abogado at doon nakasulat na naglalaan ng naturang halaga para kay Marcoleta.
Paglilinaw ni Lacson bagama’t hindi naaayon ang paghingi ng allocables ngunit hindi naman ito maituturing na ilegal.
“Kahit ‘yung mga pinagbibigyan pa ng DPWH ng mga proyekto ay hindi pa rin maituturing na ilegal,” ani Lacson.
Ngunit, aniya, kailangan ang imbestigasyon kung tama ba ang implementasyon ng proyekto o sub-standard at kung hindi ito ghost project. Kapag ganito ang nangyari doon papasok ang problema na dapat nang himayin.
Tinukoy ni Lacson na noong Chairman ng Commission on Appointments (CA) ng Committee on Public Works and Highways si Marcoleta siya ang nagrekomenda para sa kompirmasyon ni dating DPWH Secretary Manuel Bonoan.
Aniya, narinig niya sa ilang mga mambabatas na miyembro ng komisyon, na ang ilan sa kanila ay miyembro pa rin hanggang sa kasalukuyan, at matapos niyang ibunyag na isang mambabatas ang ‘nambukol’ agad at pinakiusapan siya na ituloy ang imbestigasyon dahil sila ang mga ‘nabukulan’.
Ngunit tumanggi na si Lacson na tukuyin kung sino ang ‘nambukol’. Aniya noong kinokompirma ang DPWH secretary ay humingi ng project at sinabi pang ‘marami sila’.
Ibinunyag ni Lacson na sa orihinal na request ay P1.5 bilyon ang project na hinihingi ngunit P500 milyon lamang ang naibigay.
Sa huli, ‘nakanganga’ na lang umano ang mga kasamahang mambabatas dahil wala namang nakarating sa kanila.
Inilinaw ni Lacson na ang ‘allocables’ ay dating pork barrel, naging leadership fund, at naging insertion na hanggang ngayon ay hindi pa nawawala.
