2,396 Iskolar ng UCC graduate na

NAGTAPOS na sa kanilang pag-aaral ang 2,396 iskolar ng University of Caloocan City (UCC).

Dumalo sa seremonya ang mga opisyal ng Caloocan City sa pangunguna ni Mayor Dale Gonzalo “Along” Malapitan kasama si Senator Paolo Benigno “Bam” Aquino IV bilang panauhing pandangal na ginanap sa SM Mall of Asia Arena.

Binigyang-diin ni Sen. Aquino kung paano nagbibigay ang Lungsod ng Caloocan ng libreng edukasyon sa kolehiyo sa UCC para sa mga residente sa ilalim ng City Ordinance No. 0553, Series of 2014, bago pa ipinanukala ang mga katulad na batas sa pambansang antas.

Samantala, may kabuuang 372 mag-aaral ang ginawaran ng Latin Honors habang ang ibang nagtamo ng special awards ay nakatanggap ng regular na cash incentives na ipinagkakaloob ng pamahalaang lungsod sa isang hiwalay na seremonya ng pagkilala, kabilang ang P10,000 para sa mga magna cum laude at P5,000 para sa mga cum laude.

Binati ni Mayor Along ang halos 3,000 Batch 2026 graduates ng UCC, kabilang ang mga nasa graduate school, sa kanilang pagpupursige at tiniyak na magpapatuloy ang suportang kanilang natanggap mula sa pamahalaang lungsod kahit na lampas na sa kanilang pagtatapos.

“Binabati ko po ang mga estudyante mula sa UCC na nagsipagtapos ng kanilang pag-aaral, kasama ang kanilang mga magulang at guro na sumubaybay at sumuporta sa kanila mula sa simula ng kanilang pag-aaral,” pahayag ni Mayor Malapitan. (VICK AQUINO)