HATAW! D'yaryo ng Bayan hatawtabloid.com
DALAWANG high-value individuals (HVI) ang naaresto habang humigit-kumulang isang kilo ng pinaghihinalaang shabu na nagkakahalaga ng ₱6.8 milyon ang nakumpiska sa isang buy-bust operation sa Mabalacat City, Pampanga kamakalawa.
Sa ulat na ipinadala kay PRO3 Director PBGeneral Jess B Mendez, ang operasyon sa Sitio Bana, Brgy. Dolores ay pinangunahan ng Mabalacat CPS SDEU, kasama ang suporta ng 2nd PMFC Pampanga at PDEA RO3.
Kinilala ang mga naaresto na sina alyas “Kuya” at alyas “Panggay,” na parehong nakalista bilang mga high-value individuals (HVI).
Nakumpiska rin ng mga operatiba mula sa mga suspek ang isang kalibre .45 na baril, isang magasin, at apat na bala.
Kasunod nito ay pinuri ni PBGeneral Mendez ang mga operating unit, at binanggit na ang operasyon ay resulta ng pinaigting na kampanya laban sa droga na naaayon sa PNP Focused Agenda. (MICKA BAUTISTA)
