HATAW! D'yaryo ng Bayan hatawtabloid.com
INARESTO ng National Bureau of Investigation (NBI) ang 48 indibiduwal kabilang ang pitong dayuhan na sangkot sa ilegal na pagpapatakbo ng online “Love Scam”, “Pig Butchering”, at “Cryptocurrency Investment Fraud”, sa isang entrapment operation sa isang condominium sa Parañaque City, noong Biyernes, 17 Abril.
Lumilitaw sa ulat na sinalakay ng NBI-Special Action Unit (NBI-SAU) ang online scam hub, na mala-call center office ang set-up nang mapatunayan sa isinagawang validation ang ilegal na gawain, gamit ang Warrant to Search, Seize, and Examine Computer Data (WSSECD).
Natuklasan ng mga ahente ng NBI-SAU sa ilang condominium units ang maraming computer workstations, laptops, mobile phones, internet routers, at iba pang digital devices, na katulad ng set-up ng lehitimong call center.
Nakita sa mga pagsusuri sa computer units, ang mga preparadong scripts sa digital files—ang step by step na susundin ng scam agent sa pakikipag-usap at panghihimok sa potensiyal na mga biktima, para sa modus operandi.
Hinihikayat ang biktima na maglipat ng pondo sa pamamagitan ng iba’t ibang cryptocurrency wallets at pinapanatili ang ugnayan sa kanila upang patuloy na huthutan.
Isinalang sa inquest proceedings ang mga suspek sa reklamong paglabag sa Section 4(b)(2) (Computer-Related Fraud) ng Republic Act 10175 (Cybercrime Prevention Act of 2012) at ng RA 12010 (AFASA Law). (HNT)
