Eman ‘di kakasa sa ring kay Jimuel: kapatid ko po siya

RATED R
ni Rommel Gonzales

SA guesting ni Eman Bacosa sa Fast Talk with Boy Abunda ay kinumusta ito ni Boy Abunda tungkol sa relasyon nila ni Jimuel Pacquiao na kapatid niya sa ama nilang si Manny Pacquiao.

“Ayos naman po. Support po ako sa career niya,” sagot ni Eman.

Sa tanong ni Tito Boy kay Eman kung tatanggapin niya sakaling may alok na labanan niya si Jimuel sa isang boxing ring ay tinanggihan niya.

“Unang-una, hindi po. Kasi kapatid ko po siya. 

“At saka wala naman pong kasiyahan na mangyayari roon, kung matalo man o manalo ka sa kapatid mo,” umpisang sinabi ni Eman.

“Siyempre, ayaw din ‘yun ni dad. Ayoko rin masaktan si daddy dun,” pagtukoy pa ni Eman sa Pambansang Kamao.

“At saka, I really love you kuya,” pagtukoy naman ni Eman kay Jimuel.

Ibinahagi rin ni Eman na pangarap niyang makakuha ng mga titulo mula sa World Boxing Council at World Boxing Association tulad ni Manny.

Sa kasalukuyan ay napanonood si Eman, na isang Sparkle Artist, sa Never Say Die kasama sina Jillian Ward, David Licauco, Raheel Bhyria, at Kim Ji Soo.