HATAW! D'yaryo ng Bayan hatawtabloid.com
RESULTA NG PATULOY na kampanya ng Quezon City Police District (QCPD) laban sa ilegal na droga, dalawang lalaking tulak ang naaresto matapos makompiskahan ng mahigit P903,000 ng droga, sa magkahiwalay na operasyon sa Novaliches.
Sa ulat kay PBGEN Randy Glenn Silvio, QCPD District Director, mula kay PLt. Col. Dave Capurcos, hepe ng Novaliches Police Station 4, naunang nadakip ang 24-anyos na si alyas Boss, nitong 11 Abril 2026, dakong 5:15 ng hapon sa isinagawang buybust operation sa Brgy. Nagkaisang Nayon, Novaliches.
Dinakip si Boss matapos bentahan ng pinatuyong marijuana ang pulis na nagpanggap na buyer. Nakuha sa posisyon ng suspek ang mga sumusunod, 496.2 gramo na nagkakahalaga ng ₱744,300 at 769 gramo ng liquid marijuana, nagkakahalaga ng ₱153,800.
Nakompiska rin sa suspek ang isang iPhone 13, mga kagamitan sa pag-iimpake, at isang elite backpack.
Samantala, sa isa pang operasyon naaresto ang isang alyas Danilo, 38 anyos, sa inilatag na checkpoint ng pulisya sa Susano Road, Brgy. San Agustin, Novaliches. Nasamsaman ang suspek ng isang sachet ng shabu na tumitimbang ng 0.84 gramo, may halagang ₱5,712.00.
Sa pagsusuri ng rekord, lumabas na si alyas Danilo ay may nakaraang kaso sa paglabag sa RA 9262 (Violence Against Women and Their Children Act) noong taong 2021.
Ang dalawang suspek ay kasalukuyang nasa ilalim ng kustodiya ng pulisya at mahaharap sa mga kasong paglabag sa Republic Act 9165 (Comprehensive Dangerous Drugs Act of 2002). Isasailalim sila sa inquest proceedings sa Quezon City Prosecutor’s Office. (ALMAR DANGUILAN)
