“Ngayong Pasko’y Ikaw Pa Rin” bagong single ng Revival King na si Jojo Mendrez

ALAM MO NA!
ni Nonie Nicasio

KINILALA ang mga Christmas song na “Sana Ngayong Pasko” ni Ariel Rivera at “Pasko Na Sinta Ko” ni Gary Valenciano, na bukod sa napaka-emosyonal ay talaga namang ramdam ang pangungulila sa taong minamahal.

Kaugnay nito, isa na namang Christmas song ang isisilang na sobrang emosyonal din na ihahatid ng Star Music, mula sa komposisyon ng dekalibreng si Jonathan Manalo at ito’y bibigyang buhay ng tinig ng Revival King na si Jojo Mendrez.

Ang titulo ng kanta ay “Ngayong Pasko’y Ikaw Pa Rin”. Isa itong highlight sa career ni Jojo, dahil ang nabanggit na kanta ay ginawa talaga specifically for him ni Jonathan Manalo at isang proyekto ng Star Music Philippines.

Talagang mamamangha, luluha at mababalikan ang mga eksena ng iyong buhay lalo pa at napakaswabe at punong-puno ng puso ang rendisyon ng Revival King sa kanta.

Base sa mga nakapakinig na ng kanta, ito’y maihahalintulad daw sa kanta nina Gary V. at Ariel.

Narito naman ang reaksiyon ni Jojo. “I’m honored, kasi ang mga kanta nina Gary V. at Ariel ay timeless, ito ay nasa puso ng mga tao at every Christmas ay  napapakinggan natin. Ito ay maitututing kong isang highlight ng aking showbiz career. Isang napakalaking karangalan para sa akin ito.”