WALANG kinukuha o pinahintulutan na maging fitness instructor para sa mga physical fitness program ang Philippine National Police (PNP) para sa buong organisasyon.
Ito ang paglilinaw ng PNP na pinamumunuan ni Gen Nicolas Torre III, matapos maimbitahan ng Public Community Affairs and Development Group (PCADG) ang fitness vlogger na si Rendon Labrador para sa 93 weight loss challenge sa naturang yunit.
Sa naging memo na inilabas ni PNP Directorate for Police Community Relations Director PMGen. Roderick Augustus Alba, ang naturang physical activity nitong nakaraang Huwebes, 19 Hunyo ay insyatibo lamang ng PCADG at ng mismong mga miyembro ng yunit na kabilang dito.
Batay sa memorandum, inatasan ang mga pulis na tigilan ang pagbabahagi ng mga misleading contents dahil wala namang naging utos ang hepe na kumuha ng fitness instructor para pangunahan ang kahit anong physical activities o trainings.
Ito aniya ay para maiwasan ang paglaganap ng mga maling impormasyon na maaring maging rason ng pagkalito ng publiko.
Samantala, nauna rito ay walang naging personal na kaalaman si PNP Spokesperson P/BGen. Jean Fajardo hinggil sa pagiging fitness coach ni Labrador sa PNP. (ALMAR DANGUILAN)
