HATAW! D'yaryo ng Bayan hatawtabloid.com
TAHASANG sinabi ni Atty. Howie Calleja na si Senate President Francis “Chiz” Escudero ay nanunuya sa kanyang paglabag sa batas at nanganganib na masira ang demokratikong institusyon sa pagsisikap na ‘iligtas’ si Vice President Sara Duterte sa paglilitis at tila nais itago sa publiko kung paano niya ninakaw ang pondo ng bayan.
Tinukoy ni Calleja na mula noong 5 Pebrero, nang isumite ang reklamo sa Senado hanggang sa kasalukuyan ay tila naghahanap ng paraan si Escudero para hindi managot si Sara sa daan-daang milyong pisong pera ng bayan na maaaring nasa kanyang bank account sa Bank of Philippine Islands.
Ipinunto ni Calleja na noong Martes, nang sa wakas ay magpulong ang Senado, matapos ang mahigit apat-na-buwan pagkaantala, sa kabila ng mandato ng konstitusyon para sa ‘agarang paglilitis’ ay pinahintulutan ni Escudero ang mga senador na pinaniniwalaang makiling kay Duterte na ibalik ang reklamo sa Kamara at tanungin ang mga miyembro ng papasok na 20th Congress kung handa silang litisin si Sara.
“Senator-judges are not allowed to do that. They must only listen to the evidence and vote whether to convict or acquit. When Sen. Bato moved for the return of the complaint to the House and even its dismissal, he was openly protecting Sara from trial,” tahasang pahayag ni Calleja.
Naniniwala si Calleja na batid ni Escudero na nasa delikadong kalagayan siya alinsunod sa batas dahil ang impeachment court ay hindi maaaring mag-remand ng kaso sa Kamara, o mag-utos ng pagbabalik.
Binigyang-diin ni Calleja, ang reklamo ay nasa senado, may presumption ‘yan ng legality at may precedent na ruling na ganyan noong impeachment trial ni Corona.
“When it was resolved to ask the House under the 20th Congress if it would try Sara, that was illegal, let alone inane and impossible since how can the 20th Congress reply now when it is not yet in existence?” dagdag niya.
Pakiramdam ni Calleja, marahil dahil sa lumalaking opinyon ng publiko laban sa sitwasyon na walang paglilitis, at marahil dahil nalilito na siya sa kagulohan noong sesyon noong Martes kaya’t pinayagan ang pagpapadala ng subpoena kay Duterte para ipaliwanag ang kanyang panig, ito ang dahilan kaya awtomatikong nakakuha ng hurisdiksiyon ang impeachment court sa kaso.
“Taranta na si Chiz. Sa rami ng banat sa kanya and the many statements from various key sectors opposing his pro-Sara and no-trial stance, he had to save his political skin and at the same time protect Sara. Naipit siya,” pagwawakas ni Calleja. (HATAW News Team)
