Arjo ‘di napabagsak ng paninira, ‘wagi ulit sa district 1 ng QC

MATABIL
ni John Fontanilla

HINDI nagabi ng paninira at muling nagwagi bilang congressman ng District 1 ng Quezon City ang aktor na si Arjo Atayde.

Isa nga si Cong. Arjo sa mga artistang pinalad na manalo.

Pagpapatunay lamang na maraming taga-distrito uno ng Quezon City ang nagmamahal at naniniwala kay Cong. Arjo na walang inisip kundi ang kapakanan, makatulong, at magbigay ng magagandang proyekto sa kanyang sinasakupan, katulad ng kanyang mga ginawa nang una siyang nanalo kaya’t dodoblehin pa ngayon.

Labis-labis nga ang nagpapasalamat si Cong. Arjo sa Distrito Uno.

Taos-pusong pasasalamat ang gusto nitong ipararing sa Distrito Uno.

“Maraming pagod, sakripisyo, at emosyon ang kaakibat ng bawat araw. Pero sa gitna ng lahat ng iyon, kayo ang nagsilbing lakas ko. Kayo ang dahilan kung bakit patuloy akong tumatayo, lumalaban, at naglilingkod.

“Sa bawat pamilya na tumanggap sa amin, sa bawat kamay na aking nakamayan, at sa bawat mata na nagpakita ng tiwala, salamat sa inyo. Hindi ko kayo kailanman tiningnan bilang simpleng botante lang. Kayo ay inspirasyon, gabay, at dahilan kung bakit umiikot ang lahat ng ginagawa ko bilang inyong kinatawan.

“Sa lahat ng naniwala at patuloy na naniniwala sa ating adbokasiya, sa mga kasama nating nanindigan para sa tunay na pagbabago, hinding-hindi ko kayo bibiguin.

“Kasama ng buong Team Aksyon Agad, tuloy ang trabaho. Tuloy ang malasakit. Tuloy ang Aksyon Agad, serbisyong mabilis, tapat, at totoo.

“Muli, maraming salamat sa inyong tiwala at pagmamahal. Para sa inyo ang lahat ng ito.”