Willie ‘di pa raw makausap, kasamahan sa production kanya-kanya nang hanap ng raket

PUSH NA’YAN
ni Ambet Nabus

BALITANG nagsisintir pa rin at hindi makausap ng maayos si Willie Revillame matapos nga itong mabigo sa kanyang kandidatura bilang senador.

Ayon sa ilang mga tsismis na nakarating sa amin, nagka-kanya na raw ng hanap ng raket ang mga kasamahan nito sa produksiyon dahil napabalita ngang mukhang magbibilang na naman daw ng mahabang panahon para makabalik sila sa TV.

Bago pa kasi mag-eleksiyon, inalis na o tinanggal na sa ere ang show ni Kuya Wil  sa TV 5 at dahil natalo pa ito sa eleksiyon, mas malabo umano itong makabalik sa ere.

“Wala pa kaming balita from him. Hindi pa namin siya makontak o maringgan man lang. Nag-deactivate rin yata ng kanyang mga contact at gadgets,” tsika ng isang matagal na nilang kasama sa production.

At dahil nagkakagulo-gulo na raw sila since campaign period up until the elections, mukha nga raw papunta na sa “kangkungan” ang show na kanilang minahal din at inalagaan.

Ang sinasabing ‘gulo’ nga raw po ay may kinalaman sa mga unpaid dues, mga broken promises, at tiwalang nawala all because of politics?