HATAW! D'yaryo ng Bayan hatawtabloid.com
RATED R
ni Rommel Gonzales
ANG buhay ay parang gulong na umiikot. Kung dati ay nasa ilalim, darating ang panahon, nasa ibabaw naman.
Sa kaso ng cutie Viva male star na si Rabin Angeles, kung dati ay naglalakad at nagko-commute, ngayon ay isang brand new SUV ang sinasakyan kapag lumuluwas mula Pampanga para tumungo sa mga showbiz commitment.
Katas ito ng pagiging celebrity endorser ni Rabin ng South Korean brand na The Green Flavonoid for The Lab by Blanc Doux ng Viva Beauty.
Kaya hinahasa na ni Rabin ang kanyang driving skills habang hinihintay ang kanyang lisensiya para magmaneho.
Bungsod ng kasikatan ni Rabin bilang isa sa mga bida ng Mutya ng Section E kaya hindi nagdalawang isip ang na kunin siyang brand ambassador ngskincare product.
Sa kasalukuyan ay hindi na sumasakay sa Point-to-Point bus (P2P) si Rabin. “Dati po noong nagwo-workshop pa ako, from Pampanga, ang workshop ko po noon, mga 10:00 a.m. sa Ortigas, Pasig City.
“Babyahe po ako, mga 7:00 a.m., aalis na po ako. Magpi-P2P ako papunta sa Trinoma, then sasakay ako ng MRT.
“Bababa ako ng Shaw Boulevard, tapos maglalakad lang po ako papunta sa Tektite.
“Wala po akong pamasahe noon eh,” lahad ni Rabin.
Ang Tektite ay ang building sa Ortigas na naroroon ang opisina ng Viva Entertainment.
Hindi na muling nasubukan ni Rabin na sumakay sa bus mula noong magkaroon siya ng sariling sasakyan, pero naglalakad pa rin siya paminsan-minsan.
“Hindi ko pa po nata-try ulit, pero palagi po akong naglalakad kapag malapit lang kasi hindi po ako marunong mag-drive.
“’Yung brother ko po ang nagda-drive.”
At dahil guwapo at kilala na, kapag naglalakad siya ay may mga taong nakikilala na si Rabin, lalo na ang fans ng Mutya Ng Section E.
Samantala, may collab na rin si Rabin sa beauty product, ang kanyang line of unisex fragrances na pinangalanang Bin Perfume.
