HATAW! D'yaryo ng Bayan hatawtabloid.com
MULING pinagtibay ng TRABAHO Partylist ang suporta nito sa Tulong Panghanapbuhay sa Ating Disadvantaged/Displaced Workers (TUPAD) program ng Department of Labor and Employment (DOLE), bilang isang mahalagang hakbang sa pagbibigay ng tulong at oportunidad sa mga sektor na nasa laylayan sa bansa sa pamamagitan ng emergency employment at skills training.
Kamakailan, isang inisyatiba, 15 babaeng persons deprived of liberty (PDLs) mula sa Puerto Princesa City Jail ang sumailalim sa TUPAD training program.
Layunin ng programa na ihanda sila sa pagbabalik sa lipunan matapos ang kanilang pagkakakulong sa pamamagitan ng pagbibigay ng mga kasanayang maaaring gamitin sa paghahanapbuhay. Isa ito sa mga hakbang ng gobyerno upang matiyak na walang maiiwang Filipino sa pag-angat at pagbangon ng bayan.
Ang TUPAD ay nagbibigay ng panandaliang trabaho at suporta sa kabuhayan para sa mga nawalan ng trabaho, kulang sa trabaho, pansamantalang manggagawa, at iba pang nangangailangang sektor.
Kadalasan, ang mga benepisaryo ay nakikibahagi sa mga proyektong nakabatay sa komunidad gaya ng clean-up drives, pagkukumpuni ng impraestruktura, at mga aktibidad na may kaugnayan sa pangangalaga ng kalikasan na tumatagal nang hanggang 30 araw.
Ayon sa TRABAHO Partylist, kabilang sa kanilang adbokasiya ang pagbibigay prayoridad sa mga sektor na kadalasang hindi napapansin sa mga oportunidad pang-ekonomiya, gaya ng mga bilanggo o persons deprived of liberty, solo parents, katutubo, matatanda, persons with disabilities (PWDs), at mga manggagawa sa impormal na sektor gaya ng mga nagtitinda sa kalsada at construction workers.
“Layunin naming lumikha ng marangal na trabaho para sa lahat ng Filipino, lalo sa mga nasa laylayan ng lipunan. Sa pamamagitan ng mga programang gaya ng TUPAD, hindi lamang sila nagkakaroon ng pansamantalang kita kundi nagkakaroon din sila ng panibagong pag-asa upang makabangon muli at makahanap ng trabaho o hanapbuhay,” pahayag ni Atty. Mitchell-David Espiritu, tagapagsalita ng TRABAHO Partylist.
Patuloy na isinusulong ng TRABAHO Partylist ang dagdag pondo at mas malawak na implementasyon ng TUPAD sa mga urban poor communities, liblib na barangay, at mga lugar na naapektohan ng kaguluhan o kalamidad.
Naninindigan ang grupo na ang tunay na pag-unlad ng ekonomiya ay makakamtan lamang kung ang mga oportunidad ay makararating sa mga pinakanangangailangan.
Habang patuloy na hinaharap ng bansa ang mga hamong pang-ekonomiya, nananatiling mahalaga ang pagtutulungan ng mga programa ng DOLE at mga kaalyadong mambabatas gaya ng TRABAHO Partylist sa pagbubuo ng isang inklusibo, matatag, at makatarungang puwersa ng paggawa. (30)
