HATAW! D'yaryo ng Bayan hatawtabloid.com
NANAWAGAN si Senador Win Gatchalian sa Department of the Interior and Local Government (DILG) na atasan ang local government units (LGUs) na magtatag ng mga lokal na literacy coordinating councils para sa pagpapatupad ng mga epektibong programa sa literacy o kakayahang magbasa, sumulat, at magbilang.
Binigyang-diin ng mambabatas ang mahalagang papel ng mga LGU sa paglaban sa illiteracy, tulad aniya ang pagsasagawa ng house-to-house na pagsusuri upang matukoy ang mga out-of-school individuals na nananatiling functionally illiterate.
Sa ginanap na pagdinig sa Senado kaugnay ng 2024 Functional Literacy, Education, and Mass Media Survey (FLEMMS), nagbabala ang senador na mahigit 18 milyong Filipino ang nananatiling functionally illiterate, kahit na nakatapos ng basic education.
Ang datos ay mula sa Philippine Statistics Authority (PSA) na sinuri ng opisina ng mambabatas, na nagsasabing 18.96 milyong Filipino pa rin ang hindi marunong bumasa, sumulat, magkuwenta, at umunawa.
“Hindi dapat ito mangyari. Ang pinakapayak na layunin ng basic education ay gawing functionally literate ang mga Filipino. Hindi puwedeng palampasin ang isang mag-aaral na magtatapos sa basic education ay hindi pa rin functionally literate, pero iyon ang realidad ngayon,” ani Gatchalian, Chairman ng Senate Committee on Basic Education. (NIÑO ACLAN)
