HATAW! D'yaryo ng Bayan hatawtabloid.com
NAGPAHAYAG ng matinding pagkabahala ang Sangguniang Panlalawigan (SP) ng Batangas sa estilo ng pagkaltas sa educational assistance ng mga estudyante ng lalawigan.
Nakatakdang magsagawa ng imbetigasyon ang Committee on Education, Committee on Appropriations, at Committee on Youth ng Sangguniang Panlalawigan ngayong araw (Miyerkoles) ukol sa ibinulgar na anomalya ni Board Member Alfredo Corona.
Sa kanyang privilege speech, kinondena ni Corona ang sistema ng pagkaltas ng educational assistance sa mga estudyante ng lalawigan.
Batay sa post, may nakalaang P190 milyon para sa mga scholar ng lalawigan. Sa P5,000 kada scholar, lumilitaw na nasa 38,000 ang scholars ng Batangas.
Ayon sa source ng video, nasa P1,500 umano ang kinukuhang kickback mula sa P5,000 financial assistance sa scholars. Tinatayang katumbas ito ng P57 milyong kickback kada taon.
“Maipaliliwanag ba ni Gob (Mandanas) ang nakapanghihinalang galawang ito sa Kapitolyo?” sabi pa sa video.
Hinala ng nag-post ng video, matagal na itong ginagawa sa liderato ni Mandanas.
