ABP Partylist nominee inambus sa harap ng bahay

PATAY ang 2nd nominee ng Ang Bumbero Partylist (ABP) matapos pagbabarilin ng riding in tandem sa harap ng kanyang bahay sa Sampaloc, Maynila kagabi.

Naitakbo pa sa University of Sto. Tomas (UST) Hospital ngunit idineklarang dead on arrival ang biktimang si Leninsky Bacud, dating chairman at second nominee ng ABP na tumatakbo sa May 12 party-list polls.

Batay sa inisyal na ulat ng Homicide Section ng Manila Police District (MPD), nabatid na bago mag-6:00 ng gabi nang maganap ang krimen sa harapan ng bahay ng biktima sa P. Guevarra St., Sampaloc, Maynila.

Bago ang ambush, nabatid na magkasama sina Bacud at si Jose Antonio Goitia sa isang aktibidad ngunit naghiwalay dahil pauwi na ang biktima sa tahanan nito.

Kaya ikinabigla ni Goitia nang mabalitaang tinambangan ang biktima.

Sinasabing kadarating ni Bacud sa lugar at kabababa ng kanyang sasakyan nang  pagbabarilin ng mga suspek.

Isang pulis sa lugar ang nagkapagresponde sa ambush at nakipagbarilan sa mga suspek ngunit nakatakas pa rin sakay ng isang motorsiklo.

Ayon kay PMaj. Philipp Ines, tagapagsalita ng MPD, habang isinusulat ang balitang ito ay kasalukuyan silang nagsasagawa ng hot pursuit operation.

Patuloy na iniimbestigahan ang krimen upang matukoy kung sino ang nasa likod nito at kung may kinalaman ito sa nalalapit na halalan.