Angelo iniwan na ang InnerVoices, Patrick pasok sa grupo 

MATABIL
ni John Fontanilla

TULUYAN nang iniwan ni Angelo Miguel ang kanyang grupong Innervoices, pero nagpaalam naman ito ng maayos.

Ayon sa mabait na leader ng grupo, si Atty. Rey Bergado, maayos nagpaalam sa kanila si Angelo Miguel at nirerespeto nila ang desisyon nito.

Pero may kasabihan nga na kapag may umalis, may darating, at ngayong buwan  ipakikilala ng grupong InnerVoices ang kanilang bagong vocalist, si Patrick F. Marcelino.

Kasabay ng pagpapakilala kay Patrick ang launching isang napakagandang awitin ng grupo, ang Tubig Hangin Apoy Lupa mula sa komposisyon ni Edward Mitra. 

Bukod sa nasabing awitin, tatlo pa ang iri-release ng Innervoices ngayong taon. Ang grupo ay binubuo nina Atty. Rey, Rene Tecson Joseph Cruz, Joseph R. Esparrago, Alvin Peliña Herbon, at ang pinakabago, si Patrick.