ARESTADO ang isang Italian national matapos ireklamo ng panghihipo sa puwitan ng empleyado ng isang convenience store sa Brgy. Santiago, bayan ng Sto. Tomas, lalawigan ng Batangas, madaling araw nitong Linggo, 26 Enero.
Kinilala ng pulisya ang suspek na si alyas Claudio, 58 anyos, mula sa Milan, Italy.
Sa imbestigasyon, dumating si Claudio sa tindahan at nagtanong sa biktimang kinilalang si alyas Elena na noon ay nag-aayos ng kanilang mga paninda.
Bigla umanong hinipuan ng suspek si alyas Elena sa kaniyang puwitan at sinabihang malaki ang kaniyang dibdib.
Nagtungo ang biktima sa backroom ng kanilang tindahan upang tingnan ang kuha ng CCTV kung saan niya nadiskubreng nagbulsa ng facial wash ang suspek.
Agad isinumbong ni alyas Elena ang insidente sa security guard na naka-duty na si alyas Ronel na siyang kumapkap sa suspek.
Inilabas ni alyas Claudio ang ibinulsang facial wash saka binayaran sa kahera.
Inilabas ni alyas Ronel ang suspek na nagsabing gagamit ng palikuran sa kalapit na gasolinahan ngunit bumalik siya at dinuraan sa mukha ang guwardiya.
Tumakas ang suspek ngunit agad nakahingi ng tulong ang guwardiya sa mga pulis na siyang tumugis at dumakip sa dayuhan.
Kakaharapin ng suspek ang mga kasong Acts of Lasciviousness at Unjust Vexation.
