HINDI nakaligtas sa kamatayan ang isang 69-anyos lola nang bumalik sa nasusunog nilang tahanan sa Barangay Old Balara, Quezon City nitong Lunes ng umaga.
Ayon kay Quezon City Fire District (QCFD) Marshal Fire Senior Supt. Flor-ian Guerrero, bandang 9:03 ng umaga, 27 Enero, nang magsimula ang sunog sa No. 808 Old Balara, Quezon City.
Unang iniulat na nawawala ang matanda ngunit nang maapula ang apoy bandang 10:49 ng umaga ay natagpuan ang sunog na bangkay nito sa loob ng natupok na bahay.
Lumalabas sa imbestigasyon na nagpasya ang biktima na bumalik sa loob ng nasusunog na bahay bagamat pinipigilan ng kanyang mga kaanak.
Nagpumiglas ang matanda dahil may nais umano siyang balikan sa nasusunog nilang tahanan, hanggang hindi na siya nakalabas ulit.
Napinsala si Rolly Guiruela, 40, ng second degree burn sa kaliwang balikat.
Patuloy ang imbestigasyon ng mga awtoridad kung ano ang sanhi ng sunog. (ALMAR DANGUILAN)
