DERETSO kalaboso ang isang lalaki matapos arestohin ng pulisya bunsod ng marahas na pananakot sa mga residente sa Brgy. San Pedro, lungsod ng San Jose Del Monte, sa lalawigan ng Bulacan, nitong madaling araw ng Martes, 21 Enero.
Ayon sa ulat na ipinadala kay P/Col. Satur Ediong, provincial director ng Bulacan PPO, dinakip ng mga tauhan ng San Jose del Monte CPS ang 57-anyos suspek dakong 12:10 ng madaling araw kahapon kasunod ng ulat ng panggugulo at pagwawala habang may nakasukbit na baril sa nabanggit na barangay.
Nabatid na talamak na basagulero ang suspek sa naturang lugar.
Nakompiska mula sa suspek ang isang walang lisensiyang Smith & Wesson caliber .38 revolver, na walang serial number, at kargado ng tatlong bala.
Nakatakdang sampahan ang suspek ng mga kasong paglabag sa RA 10591 kaugnay ng Omnibus Election Code (Gun Ban), Alarms and Scandal, at Grave Threats. (MICKA BAUTISTA)
