BINAWIAN ng buhay ang isang pari sa insidente ng banggaan ng isang motorsiklo at sports utility vehicle (SUV) sa Brgy. Naubay, bayan ng Llorente, lalawigan ng Eastern Samar, nitong Miyerkoles, 15 Enero.
Kinilala ng pulisya ang biktima na si Fr. Alejandro Galo, 66 anyos, tagapangasiwa ng mga ari-arian ng simbahan sa Diyosesis ng Borongan.
Lumabas sa paunang imbestigasyon na sakay ang biktima ng kaniyang motorsiklo nang makabanggaan ang kasalubong na sasakyan sa pakurbang bahagi ng kalsada.
Namatay ang biktima sanhi ng matitinding pinsalang inabot ng kaniyang katawan mula sa insidente habang nasa kustodiya ng Borongan MPS ang driver ng SUV para sa kaukulang disposisyon at dokumentasyon.
Samantala, humihiling ng panalangin ang Diyosesis ng Borongan para sa pagkilala sa buhay ni Fr. Galo.
