Kaligtasan ng QCitizens tiyakin tagubilin ni Mayor Joy sa bagong QCPD

SA PAGPAPALIT ng liderato ng Quezon City Police District (QCPD) kahapon, mahigpit na tagubilin ni  Quezon City Mayor Joy Belmonte kay P/Col. Melecio Buslig, Jr., na iprayoridad ang kaligtasan ng bawat QCitizens.

Personal na sinaksihan nina Belmonte at National Capital Region Police Office (NCRPO) Director P/MGen. Jose Melencio Nartatez, Jr., ang turnover ceremony — ang pagpalit ni Buslig kay P/BGen. Redrico Maranan na itinalaga bilang bagong director ng Police Regional Office 3.

Si Maranan ay miyembro ng PNPA Patnubay Class of 1995 na nagsilbi bilang director ng QCPD at naging hepe ng PNP Public Information Office

Pinalitan ni Maranan sa puwesto si P/BGen. Jose Hidalgo na maagang nagretiro dahil sa planong pagtakbo bilang mayor sa bayan ng Cuyapo sa Nueva Ecija.

Ayon kay Maranan, umaasa siyang ipagpapatuloy ni Buslig ang mga proyekto ng QCPD partikular ang  peace and order sa lungsod.

Binigyan diin ni Belmonte na hindi matatawaran ang serbisyo ni Maranan bilang QCPD director.

“Masasabi ko na si Gen. Maranan ang pinakamagaling sa lahat ng district director sa ilalim ng aking pagiging mayor ng QC,” ani Belmonte.

Naibaba ni Maranan ang crime rate sa lungsod kasabay ng pagpapatupad ng mga polisiya na  makatutulong sa mga residente ng Lungsod.

Hiling ni Belmonte kay Nartatez na huwag dalasan ang palitan ng district director upang maipatupad nang tul0y-tuloy ang programa ng pulisya. (ALMAR DANGUILAN)