HATAW! D'yaryo ng Bayan hatawtabloid.com
ni MICKA BAUTISTA
PATAY agad ang isang negosyanteng babae matapos pagbabarilin ng mga suspek na magkaangkas sa motorsiklo sa bayan ng Sta. Maria, lalawigan ng Bulacan, nitong Linggo ng umaga, 29 Setyembre.
Sa ulat na ipinadala ng Sta. Maria MPS kay P/Col. Satur Ediong, Officer-In-Charge ng Bulacan PPO, kinilala ang biktimang si Delia Santos, 62 anyos, may-ari ng Dhel’s Peanut Butter, residente sa Brgy. Sta Cruz, sa nabanggit na bayan.
Lumitaw sa inisyal na imbestigasyon ng mga tauhan ng Sta. Maria MPS na dakong 7:50 am kahapon nang maganap ang pamamaril sa harap ng isang apartment na pagmamay-ari ng biktima sa naturang lugar.
Napag-alaman na maniningil ng bayad sa mga umuupa sa kaniyang apartment si Santos nang biglang sumulpot ang mga suspek saka siya pinagbabaril.
Ayon sa saksi, nakarinig siya ng tatlong sunod-sunod na putok ng baril na nagmula sa riding-in-tandem hanggang nakita niyang bumulagta sa lupa ang biktima na agad niyang ikinamatay.
Tumakas ang mga suspek sa direksiyon patungong Bypass Road na ngayon ay sentro ng pagtugis ng mga tauhan ng Sta. Maria MPS.
Si Santos ay dating maliit na sari-sari store owner na nagtagumpay at umaseno dahil sa kanyang produktong Dhel’s Peanut Butter. Isa siyang aktibong mananampalataya ng Members of Church of God International (MCGI) o mas kilala bilang Ang Dating Daan (ADD).
