P3.4-M shabu nasamsam 3 Chinese nationals timbog

NASABAT ng mga awtoridad ang halos 500 gramo ng hinihinalang shabu na tinatayang nagkakahalaga ng P3,400,000 mula sa tatlong Chinese nationals sa ikinasang buybust operation nitong Lunes ng gabi, 1 Hulyo, sa lungsod ng Angeles, lalawigan ng Pampanga.

Kinilala ng Philippine Drug Enforcement Agency (PDEA) Pampanga Provincial Office ang mga nadakip na suspek na sina Bin Da, 23 anyos; Hei Xiao, 21 anyos; at Gua Xiao, 20 anyos, pawang naninirahan sa Shanghai Bldg., Brgy. Balibago, sa nabanggit na lungsod.

Bukod sa mga ilegal na droga, nakompiska sa mga suspek ang pitong sari-saring touch screen cellular phones; dalawang susi ng kotse; at ang marked money na ginamit ng poseur buyer.

Ayon sa team leader ng mga operatiba, sobrang maingat ang mga suspek habang nakikipagtransaksiyon, at inabot sila ng isang buwan para makipag-ugnayan sa droga sa mga suspek.

Kasalukuyan nang inihahanda ang kasong paglabag sa Section 5 (sale of dangerous drugs) kaugnay ng Section 26B (conspiracy to sell drugs) ng RA 9165 o Comprehensive Dangerous Drugs Act of 2002 na isasampa laban sa mga suspek. (MICKA BAUTISTA)