HATAW! D'yaryo ng Bayan hatawtabloid.com
ni Almar Danguilan
PINATAWAN ngpreventive suspension ng Office of the Ombusdsman si Bamban, Tarlac Mayor Alice Guo at ang dalawang opisyal habang patuloy ang imbestigasyon ng mga awtoridad sa kanilang pananagutan sa ilegal na aktibidad ng Philippine offshore gaming operator (POGO) hub sa kanilang bayan.
Ang hakbangin ng anti-graft body ay kasunod ng sulat ng Department of the Interior and Local Government (DILG) sa Ombudsman na may kinalaman sa pananagutan ng alkalde sa nadiskubre ng Philippine National Police – Criminal Investigation and Detection Group (PNP-CIDG) at Philippine Anti-Organized Crime Commission (PAOCC) sa bayan ng Bamban.
Sa 9-pahinang resolusyon na inilabas ng Obudsman, kasama sa pinatawan ng suspensiyon sina
Municipal Business Permit and Licensing Officer (MBPLO) Edwin Ocampo at Adenn Sigua, Municipal Legal Officer.
“They are hereby preventively suspended, without pay, during the period of investigation until its termination, but not to exceed six months,” ayon utos ni Ombudsman Samuel Martires.
Ayon sa Ombudsman, may malakas na ebidensiyang ipinapakita para ipataw ang suspensiyon sa tatlong opisyal ng bayan. Sa pamamagitan nito, sila ay pansamantalang tatanggalin sa kanilang mga tanggapan upang hindi maperhuwisyo ang imbestigasyon..
Binigyang-diin ni Martires, nasa ilalim ng tanggapan ng tatlong suspendidong opisyal na kinabibilangan ni Guo ang kontrol o pag-iingat sa mga kinakailangan dokumento bilang ebidensiya.
Kinompirma ni Guo na natanggap niya ang suspension order, pero naninindigan na siya’y inosente.
“Today, I received an order from the Ombudsman on my supposed six-month suspension. I agree with the process of the law and I accept the decision of the Ombudsman but I will fight for my case,” pahayag ni Guo sa kanyang Facebook page.
“I would like to reiterate my innocence and my honesty in serving our town and the people,” dagdag ni Guo.
Hindi kabilang sa mga napatawan ang bise alkalde at ang mga konsehal.
Dahil “for immediate executory” ang resolusyon, agad inatasan ng DILG for Central Luzon na ipatupad ang anim-na-buwang suspensiyon laban sa babaeng alkalde.
