HATAW! D'yaryo ng Bayan hatawtabloid.com
INIHAYAG kahapon ni PBrig. Gen. Redrico A Maranan, Quezon City Police District (QCPD) Director, ang pagkakakompiska ng P472,000 halaga ng shabu at baril sa magkahiwalay na buybust operation sa lungsod.
Sa ulat ni P/Lt. Col. Jerry Castillo, hepe ng Batasan Police Station 6, ang nadakip ay kinilalang si William Christian Gali, 28 anyos, at Joanna Martin, 24 anyos, kapwa residente sa Brgy. Batasan Hills, Quezon City. Sila ay nadakip dakong 6:30 pm nitong Miyerkoles, 13 Marso 2024, sa IBP Road, Pook Pag-asa, Brgy. Batasan Hills.
Nakompiska sa dalawa ang 40 gramo ng shabu na nagkakahalaga ng P272,000. Nakarekober din ang pulisya ng isang kalibre .45 pistol, may lamang apat na bala, at isang cellular phone.
Samantala, ayon kay P/Lt. Col. Leonnie Dela Cruz, station commander ng Payatas Bagong Silangan Police Station (PS 13), kanilang naaresto si John Clark Casugbo, 25 anyos, residente sa Payatas, Quezon City.
Naaresto si Casugbo dakong 9:35 pm, Miyerkoles, 13 March 2024, sa Sto. Ñino St., makaraang makompiskahan ng 30 gramo ng shabu na nagkahalaga ng P204,000.
Ang mga suspek ay kakasuhan ng paglabag sa RA 9165 (Comprehensive Dangerous Drugs Act of 2002).
Si Gali ay kakasuhan din ng paglabag sa RA 10591, (Comprehensive Firearms and Ammunition Regulation Act) sa Quezon City Prosecutor’s Office.
“Nais kong ipaabot ang aking pagpupugay sa mga operatiba ng PS 6 at PS 13 sa ilalim ng pamumuno ng kani-kanilang station commanders para sa kanilang walang humpay na pagsisikap sa kampanya laban sa ilegal na droga, na nagresulta sa pag-aresto sa mga suspek at pagkompiska ng mga ebidensiya. Ipinapakita lamang nito ang ating patuloy na determinasyon na ipatupad ang batas laban sa kriminalidad, lalo ang laban kontra sa ilegal na droga, bilang pagtugon sa pangangailangan na protektahan ang ating mga mamamayan dito sa ating Lungsod,” pahayag ni Maranan. (ALMAR DANGUILAN)
