HATAW! D'yaryo ng Bayan hatawtabloid.com
MASAYANG inanunsyo ng Puregold CinePanalo Film Festival ang pakikipagtambal nito sa Movie Workers Welfare Foundation, Inc. (MOWELFUND). Layunin ng kolaborasyon na ibida ang industriya ng pelikula sa Pilipinas lalo na ang mga bagong filmmaker, at ang mga kuwentong itinatampok ang buhay at kultura sa Pilipinas.
Itinatag noong 1974, ang MOWELFUND ay isang non-stock at non-profit na organisasyon na nakapokus sa sosyal na kapakanan, edukasyon, at pag-unlad ng industriya ng pelikula, at misyon nitong suportahan ang mga nagsusumikap na propesyonal sa mundo ng pelikulang Pilipino.
Ibinahagi ni Boots Anson Roa-Rodrigo, Chairman ng MOWELFUND, ang kanyang pasasalamat. “Salamat, Puregold, para sa CinePanalo. Dahil sa inisyatibong ito, nagbibigay ng tulong ang Puregold sa mga direktor at sa mga gumagawa ng pelikula, sa pagtampok ng mga pelikulang nagpapakita ng mga temang pampamilya na sumisimbolo sa pang-araw-araw na buhay ng mga Filipino.”
“Win-win” ang tambalang ito, ayon sa premyadong personalidad sa pelikula at telebisyon. “Panalo ang Puregold sa pagkintal ng mga halagahang Filipino sa pamamagitan ng makapangyarihang midyum ng pelikula. Panalo ang MOWELFUND sa pag-aayos ng mga logistik para sa mga baguhang direktor. Panalo ang mga estudyante ng pelikula at mga nagmamahal sa larangang ito, dahil binibigyang-buhay ng CinePanalo ang kanilang mga pangarap na proyekto.”
Inanunsyo kamakailan ng Puregold CinePanalo Film Festival ang pinal na listahan ng makatatanggap ng prestihiyosong film grant–anim na direktor para sa full-length film, at 25 estudyanteng direktor para sa short film–na masinsinang pinili sa 200 na kalahok mula sa iba-ibang sulok ng Pilipinas. Ipalalabas sa engrandeng debut ang mga pelikula sa Gateway Cineplex 18, Araneta City, mula Marso 15 hanggang 17.
Bakas sa mga napiling pelikula para sa festival ang temang Mga Kwentong Panalo ng Buhay, sa mga naratibo ng pagsusumikap, pakikisama, at ang matibay na diwa ng pagiging Filipino.
Nagpasalamat din ang MOWELFUND sa suporta ng Puregold sa kanilang ika-50 anibersaryo, na magdaraos ang organisasyon ng medical at dental na misyon. Nagbigay ang Puregold ng mga grocery gift bags para sa mga miyembro ng komunidad ng pelikula.
Ngayong papalapit na ang Puregold CinePanalo Film Festival, ani Puregold senior marketing manager Ivy Hayagan-Piedad, “Mula sa kaibuturan ng aming puso, pinasasalamatan namin ang MOWELFUND at ang lahat ng katrabaho namin sa kanilang mahalagang gampanin hindi lamang sa pagtatanghal ng mga nakatutuwang kuwentong Filipino, kung hindi pati na rin sa pagpapatatag ng aming kontribusyon sa yumayabong na industriya ng pelikulang Pilipino.”
