HINDI na nakalusot sa kamay ng batas ang isang mister na wanted sa kaso ng panggagahasa at pangmomolestiya nang malambat ng mga awtoridad sa ikinasang manhunt operation sa Caloocan City, kahapon ng madaling araw.
Sa ulat ni Caloocan police chief P/Col. Ruben Lacuesta kay Northern Police District (NPD) Director P/BGen. Rizalito Gapas, nakatanggap ng impormasyon ang Llano Police Sub-Station 7 hinggil sa kinaroroonan ng akusadong si alyas Bong, kabilang sa limang most wanted persons (MWPs) ng Caloocan police.
Katuwang ang mga operatiba ng Warrant and Subpoena Section at Intelligence Section ng Caloocan police, agad nagsagawa ang SS7 ng joint manhunt operation na nagresulta sa pagkakaaresto sa akusdo dakong 2:00 am sa kanyang tinutuluyang bahay sa Barangay Bagbaguin.
Ani Col. Lacuesta, dinakip ng kanyang mga tauhan ang akusado sa bisa ng warrant of arrest na inisyu ni Presiding Judge Barbara Aleli Hernandez Briones ng Family Court, Branch 1, Caloocan City para sa kasong Rape at (Acts of Lasciviousness) in relation to Sec. 5 (B) of RA 7610.
Pansamantalang nakapiit ang akusado sa custodial facility unit ng Caloocan police habang hinihintay ang pagpapalabas ng commitment order mula sa korte. (ROMMEL SALES)
