HATAW! D'yaryo ng Bayan hatawtabloid.com
PINAGTULUNGAN bugbugin ng walong lalaking kinabibilangan ng dalawang kagawad ng barangay at executive officer (Ex-O) ang isang pulis at kasamang sibilyan nang dakpin ang isang lalaking hinihinalang sangkot sa ilegal na droga sa Caloocan City.
Ginagamot sa hindi tinukoy na pagamutan sina P/Cpl. Roger Lagarto, nakatalaga sa Caloocan Police Station Drug Enforcement Unit (SDEU) at sibilyang si Adrian Villagomez, 37 anyos, ng Libis Espina, Brgy. 18, makaraang seryosong mapinsala at nagkasugat-sugat sa ulo, mukha, at buong katawan, batay sa inilabas na medico-legal certificate ng kanilang attending physician.
Kaagad iniutos ni Caloocan City police chief P/Col. Ruben Lacuesta ang manhunt operation laban sa mga suspek na nagresulta sa pagkakadakip kina Kagawad Jimmy Marinda, 53 anyos, at Ex-O Ferdinand Basmayor, 43, ng Brgy. 36, kapuwa positibo sa alcohol nang isailalim sa medical examination, habang tinutugis ang isa pang Kagawad na si Renato Rivera, alyas Tisoy, at lima pang lalaki.
Sa kanyang ulat kay Northern Police District (NPD) Director P/BGen. Rizalito Gapas, sinabi ni Col. Lacuesta, nagsasagawa ng paniniktik at pagmo-monitor ang mga tauhan ng SDEU sa pangunguna ni P/SSgt. Jason Taguba sa Barangay 36, dakong 11:00 pm nang arestohin ni Cpl. Lagarto at kasamang sibilyan si alyas Joshua na siyang target ng kanilang operasyon matapos mamataan sa kahabaan ng Marulas B St. Brgy, 36.
Nang dadalhin na sa Barangay Hall ang suspek upang isailalim sa imbentaryo ang nakuha sa kanyang ilegal na droga, dito sila hinarang at pinagtulungang gulpihin ng mga lalaki, kabilang ang dalawang barangay kagawad at Ex-O, kahit nagpakilala na si Lagarto na siya’y isang pulis.
Sasampahan ng patong-patong na kasong obstruction of justice, direct assault, at serious physical injuries ang mga barangay official at ang kanilang mga kasama sa Caloocan City Prosecutor’s Office. (ROMMEL SALES)
