NABULABOG ang isang passenger bus terminal sa bayan ng Laurel, lalawigan ng Batangas, nang sumabog ang isang hinihinalang granada nitong Linggo ng umaga, 10 Setyembre.
Ayon sa ulat ng Batangas PPO, nagulantang ang isang guwardiya sa isang malakas na tunog dakong 3:50 am kahapon, sa Magnificat Transport Terminal na matatagpuan sa Brgy. Bugaan East, sa nabanggit na bayan.
Lumabas sa imbestigasyon na may isang hindi kilalang lalaki ang naghagis ng isang granada sa isang nakaparadang bus na walang sakay.
Dahil sa pagsabog, nabasag ang salamin sa mga bintana ng bus habang siyam na iba pang bus ang bahagyang napinsala.
Walang naiulat na nasugatan sa insidente ng pagsabog.
Patuloy ang imbestigasyon ng pulisya upang matukoy ang pagkakakilanlan ng suspek at ang motibo sa likod ng insidente. ###
