HATAW! D'yaryo ng Bayan hatawtabloid.com
RATED R
ni Rommel Gonzales
KONTRABIDA, maldita si Zoey Tanyag, na ginagampanan ng Sparkle actress na si Kazel Kinouchi, sa kapwa niyang doktora si Analyn Santos na ginagampanan naman ni Jillian Ward bilang bida sa top-rating Kapuso series na Abot Kamay Na Pangarap.
Kilala ang karamihan sa mga Pinoy telenovela fans na mabilis maapektuhan ng kanilang napapanood, kaya marami ang galit kay Zoey/Kazel.
Naranasan na ba ni Kazel na makaharap ng mga bayolenteng fans kapag nasa pampublikong lugar?
“Fontunately, wala pa naman po akong na-e-experience na ganoon kasi hindi pa naman ako masyadong lumalabas,” at tumawa ang aktres habang kausap namin via Zoom kamakailan.
“Pero malay natin baka kapag lumabas ako may mga ganoon,” at muling natawa si Kazel.
“Pero noong huli po kaming nag-mall show sa Pampanga mayroong caught on video na ‘yung mga tao, ‘Oh Zoey huwag mo nang awayin si Annalyn’, may mga ganoon.
“Pero ‘yung manakit naman po physically, wala pa naman,” kuwento ni Kazel.
‘Pag natapos na ang AKNP, payag ba si Kazel na sa susunod niyang proyekto ay kontrabida siyang muli o magre-request siya sa GMA at sa Sparkle na “pabaitin” muna siya?
“Kung ano naman po ‘yung ibigay sa akin, siyempre that’s work, so tatanggapin ko po ‘yun.
“Kung ano man po ‘yun, thankful po ako kung ano man ang ibigay sa akin, kasi po para sa akin kung ano ‘yung nandiyan it means that it’s meant for me.”
