ANG ikalimang suspek at lider ng Flores group na pumatay sa dalawang anti-drug cops ng Mabalacat City Police Station noong nakaraang Disyembre 3, 2022 ay napatay sa pakikipagbarilan sa mga awtoridad nitong Miyerkules, Enero 25 sa Sitio Dungan, Brgy. Tabun, Mabalacat, Pampanga dakong alas- 3:40 ng madaling araw.
Ayon kay PRO3 Regional Director PBGeneral Cesar R. Pasiwen, ang napatay na suspek ay kinilalang si Kenneth Flores na nagtangka pang tumakas habang pinapuputukan ang mga police officers na magsisilbi ng Warrant of Arrest para sa kasong Double Murder laban sa kanya.
Dito na napilitang gumanti ang mga awtoridad at tinamaan si Flores na kahit duguan ay isinugod pa rin sa pinakamalapit na pagamutan subalit idineklarang dead-on-arrival samantalang narekober ng mga awtoriad sa crime scene ang isang caliber .45 pistol na kargado ng bala at isang hand grenade.
Kaugnay nito ay pinuri ni PBGeneral Pasiwen ang operating troops sa isa pang matagumpay na pagbaka laban sa krimen at idinagdag pa niyang ang hustisya ay makakamit na rin ng mga pinatay na pulis.
Aniya pa ay hindi sila titigil sa pagsasagawa ng operasyon laban sa mga sangkot sa pagkamatay ng kanilang dalawang PNP personnel at ang kanilang mga pagsisikap ay magiging matagumpay. (MICKA BAUTISTA)
