Sa Guinayangan, Quezon
BAGONG SILANG NA SANGGOL INABANDONA SA SEMENTERYO

NATAGPUAN ng isang residente ang isang bagong panganak na sanggol sa isang pampublikong sementeryo nitong Lunes ng hapon, 2 Enero, sa bayan ng Guinayangan, lalawigan ng Quezon.

Iniulat sa pulisya ni Joven Nuga, 39 anyos, residente ng Brgy. Dungawan Central, sa naturang bayan, nakita niya ang sanggol dakong 3:20 pm kamakalawa.

Sa pangunguna ni P/CMSgt. Alma Marie Cataquiz, nagresponde ang pulisya sa bisinidad ng sementeryo kung saan inabandona ang sanggol ng hindi pa kilalang ina.

Nakalagay ang sanggol, na hindi pa napuputol ang pusod, sa isang kahong walang takip.

Agad dinala ang sanggol sa Guinayangan Community Medicare upang masuri ng mga doktor.

Samantala, patuloy ang imbestigasyon ng mga awtoridad at tinitipon ang mga kuha ng mga CCTV camera sa paligid ng sementeryo na maaring maging daan upang matukoy ang pagkakakilanlan ng ina ng sanggol.

Gayondin, ipinaalam ng pulisya sa lokal na social welfare and development office ang tungkol sa inabandonang sanggol.