NAARESTO ng mga operatiba ng Quezon City Police District (QCPD) ang most wanted person (MWP) ng Antique sa kasong pangagahasa sa kaniyang dalawang anak na kapwa menor de edad.
Ayon kay QCPD Director, P/Brig. Gen. Nicolas Torre III, ang suspek na si Romel Juban, 46 anyos, ay naaresto ng mga operatiba ng Payatas Bagong Silangan Police Station 13, sa Barangay Payatas, bandang 11:45 ng umaga.
Nang makatanggap ng impormasyon ang mga pulis hinggil sa suspek na nagtatago sa Barangay Payatas ay agad nagkasa ng operasyon at sa bisa ng warrant of arrest ay inaresto ang suspek.
Nabatid, ang mga guro ng mga biktima na nasa edad 14 at 15 anyos nang pagsamantalahan ng kanilang ama noong 2019, ang nagsumbong sa mga awtoridad.
Nakapiit na ang suspek na umamin sa nagawang kasalanan sa mga anak at nakatakdang isuko sa Patnogon Municipal Police Station sa Antique. (ALMAR DANGUILAN)
