Suspek tinutugis <br> NEGOSYANTE NINAKAWAN, SAKA BINOGA

TUKOY na mga awtoridad nitong Huwebes, 10 Nobyembre, ang pagkakakilanlan ng isa sa mga armadong kalalakihang nanloob sa bahay ng isang negosyante at bumaril sa biktima sa patuloy na follow-up investigation ng pulisya sa lungsod ng Malolos, lalawigan ng Bulacan.

Naganap ang pagnanakaw at pamamaril noong 4 Nobyembre sa Purok 5, Brgy. Sumapang Bata, sa naturang lungsod dakong 6:10 am.

Kinilala ni P/Col. Relly Arnedo, provincial director ng Bulacan PPO, ang biktimang si Sofronio Moreno, alyas Tisoy, negosyante, residente sa nabanggit na barangay.

Bigla umanong binaril ng isa sa mga suspek ang biktima na sapilitang pumasok sa kanyang bahay saka tinangay ang kanyang mga nakatagong pera, alahas, at cellphone.

Sa pamamagitan ng PNP E-Rogue’s gallery, positibong kinilala ang isa sa mga suspek ng live-in partner ng biktima at dalawa pang testigo sa naganap na nakawan.

Nahaharap sa mga kasong kriminal ang mga suspek na isasampa sa korte habang patuloy ang follow-up operation ng pulisya sa posibleng pagdakip sa natukoy na suspek at dalawa pang kasabwat.

Tiniyak ni P/Col. Arnedo na ang hustisya ay isisilbi sa biktima at ang mga may kagagawan nito ay pananagutin  sa likod ng rehas na bakal. (MICKA BAUTISTA)