HATAW! D'yaryo ng Bayan hatawtabloid.com
NASAKOTE ng mga awtoridad ang isang lalaking nakatalang wanted person ng Camarines Sur dahil sa kasong panggagahasa nitong Martes, 5 Hulyo, sa bayan ng San Rafael, lalawigan ng Bulacan.
Sa ulat mula kay P/Col. Charlie Cabradilla, provincial director ng Bulacan PPO, kinilala ang arestadong suspek na si Bertito, alyas Tot, 58 anyos, nasukol sa kanyang pinagtataguan sa Sitio Bacood, Brgy. Tambubong, sa nabanggit na bayan.
Dinakip si alyas Tot, nakatala bilang top 5 most wanted person sa Camarines Sur, ng pinagsanib na puwersa ng San Rafael MPS, San Ildefonso MPS, at Minabac (Camarines Sur) MPS, sa bisa ng warrant of arrest sa kasong Rape na inilabas ni Presiding Judge Agaton Fajardo ng Naga City RTC Branch 28, walang itinakdang piyansa.
Napag-alamang matapos sampahan ng kasong panggagahasa sa Camarines Sur ay nagpakatago-tago sa batas ang suspek hanggang matunton ng mga awtoridad sa Bulacan na nagresulta sa kanyang pagkaaresto. (MICKA BAUTISTA)
