ISANG lalaking nasa talaan ng most wanted persons (MWP) ang ibiniyahe sa kulungan matapos malambat sa isinagawang manhunt operation ng pulisya sa Navotas City, kamakalawa ng hapon.
Kinilala ni Navotas City police chief Col. Dexter Ollaging ang naarestong akusado bilang si John Paul Reyala, 21 anyos, vendor at residente sa Site 8, Mandaragat St., Brgy. North Bay Boulevard South (NBBS) Dagat-Dagatan ng nasabing lungsod.
Sa ulat, unang nakatanggap ng impormasyon ang mga tauhan ng Navotas Police Warrant and Subpoena Section (WSS) na naispatan ang akusado sa kanilang lugar.
Dakong 3:35 pm, kasama ang mga tauhan ng Sub-Station 3, agad nagsagawa ang WSS ng joint manhunt operation na nagresulta sa pagkakaaresto sa akusado sa kanilang bahay.
Ang akusado ay dinakip sa bisa ng warrant of arrest na inisyu ni Hon. Josie N. Rodil, Presiding Judge ng Regional Trial Court (RTC) Branch 293, Malabon City sa kasong Frustrated Murder (RPC Art. 248). (ROMMEL SALES)