NAKAAHON ang Laguna Heroes pagkaraang makatikim ng talo sa Manila Indios Bravos nang bumawi sila ng panalo sa Olongapo Rainbow Team 7, 17-4, sa third conference ng Professional Chess Association of the Philippines (PCAP) online tournament via chess.com nitong Sabado, Setyembre 18, 2021.
Tinibag ni Grandmaster John Paul Gomez si National Master Levi Mercado para ihatid ang Heroes sa 2-1 win-loss record sa Northern Division.
Si Gomez na many-time olympiad member ay pinasuko si Mercado sa 30 moves ng Bogo Indian Defense sa rapid play.
Nagtala rin ng importanteng panalo sa Heroes sina Michella Concio, Fide Master Jose Efren Bagamasbad, Vince Angelo Medina, Kimuel Aaron Lorenzo at Arije Bayangat.
Suportado ng Greatech Philippines, Inc., SDC Global Choice, Jolly Smile Dental Clinic, KALARO at ng Rotary Club of Nuvali, kinaldag din ng Laguna Heroes ang Pasig City King Pirates, 11.5-9.5.
Susunod na makakalaban ng Heroes ang Rizal Batch Towers at ng Caloocan Loadmanna Knights sa Miyerkoles. (Marlon Bernardino)
