Bebot nag-ipit ng shabu sa kanin timbog (Dadalaw sa BF)

ARESTADO ang isang babaeng dadalaw sa kanyang boyfriend na nakakulong nang mabisto ang shabu na itinago sa kanin sa Caloocan City, kahapon ng madaling araw.

Kinilala ang naarestong suspek na si Erica Rivera, 40 anyos, residente sa Zapote St., Bagong Barrio.

Lumabas sa inisyal na imbestigasyon, dakong 1:00 am nang dumalaw ang suspek sa kanyang boyfriend na nakakulong sa Bagong Barrio Police Sub Station 5, sa Brgy. 146 para dalhan ng pagkain.

Habang nagsasagawa ng routine inspection si P/Cpl. Dandan Canuto at P/Cpl. Philip Siembre sa dalang pagkain ng suspek, may napansin silang kakaiba sa loob ng isang transparent plastic bag na naglalaman ng kanin.

Inatasan ni P/Cpl. Canuto ang suspek na buksan ang plastic bag at ilabas ang laman nito at doon nakuha ang nakapalaman sa kanin na isang transparent plastic sachet na naglalaman ng 0.9 gram ng hinihinalang shabu, tinatayang nasa P6,120 ang halaga.

Inaresto ng mga pulis ang suspek at sinampahan ng kasong paglabag sa Comprehensive Dangerous Drugs Act of 2002 sa piskalya ng Caloocan City. (ROMMEL SAĹES)