HATAW! D'yaryo ng Bayan hatawtabloid.com
BANGKAY na nang matagpuan ang isang lalaking hindi nakauwi sa kanilang bahay na nagpaalam sa kanyang pamilya na mangingisda sa Navotas City, kamakalawa ng gabi.
Ayon kay Navotas police chief P/Col. Dexter Ollaging, kinilala ang biktimang si Jaymark Panganiban, edad 25-30 anyos, nakatira sa Judge Roldan St., Brgy. San Roque.
Dakong 7:20 pm nang matagpuang nakalutang ang bangkay ng biktima sa Dike Pondohan, Dulong Tangos, Brgy. Tangos North.
Pinagtulungan iahon ng nagrespondeng mga tauhan ng Navotas City Rescue Team at mga opisyal ng barangay ang katawan ng biktima.
Ayon sa pulisya, huling nakitang buhay ang biktima ng ilang residente ng Dulong Tangos bago magtanghali habang nangingisda sa Dike Pondohan.
Dinala ang bangkay ng biktima sa Northern Police District (NPD) Crime Laboratory para sa awtopsiya upang matukoy kung ano ang ikinamatay nito. (ROMMEL SALES)
