HATAW! D'yaryo ng Bayan hatawtabloid.com
DINAKIP ng mga awtoridad nitong Lunes, 30 Agosto ang apat na lalaking nanloob sa isang simbahang Katoliko at ninakaw ang lamang pera ng mga kahon ng donasyon sa bayan ng Lian, lalawigan ng Batangas.
Kinilala ng Lian police ang mga suspek na sina John Rafael Jonson, 20 anyos; Juan Bautista, 23 anyos; at dalawang menor de edad, na dumaan sa balkon ng pangalawang palapag ng saradong St. John, the Baptist Parish Church na matatagpuan sa sentro ng bayan.
Tumakas ang mga suspek dala ang walong mga kahong naglalaman ng mga donasyong pera saka winasak at iniwan ilang metro ang layo sa simbahan at itinakbo ang salaping nahakot.
Napansin ng pamunuan ng parokya ang insidente ng pagnanakaw dakong 8:00 pm saka iniulat sa pulisya na dagliang nagresponde at nasukol ang mga suspek.
Narekober ng pulisya ang may kabuuang halagang P19,270 sa iba’t ibang denominasyon mula sa mga suspek.
Kasalukuyan nang nakapiit ang mga suspek at nahaharap mga kasong kriminal na inihahanda laban sa kanila.
