ISANG top 8 drug personality mula sa Novaliches ang nadakip ng mga awtoridad sa gitna ng pagpapatupad ng search warrant sa kanyang tahanan ng mga operatiba ng Novaliches Station (PS4) ng QCPD sa pamumuno ni Lt. Col. Richard Ian Ang.
Kinilala ni Ang ang suspek na si Mel Goloso, alyas Jun Pugad, 31, kilalang big-time drug peddler na nakalista bilang No. 8 Drug Personality sa bayan ng Novaliches.
Itinakda para sa search warrant ang tahanan ni Goloso sa Area 6, Sitio Cabuyao sa Barangay Sauyo sa kautusan ni QC Regional Trial Court Branch 77 first vice executive judge Ferdinand Baylon.
Sa pagpapatupad ng nasabing kautusan ng korte, hindi inakala ng mga pulis na madiskubre ang 15 gramo ng shabu na itinago ni Goloso sa kubling lugar sa loob ng bahay na nagkakahalaga ng P102,000.
Bukod sa pagkakasangkot sa kalakalan ng ilegal na droga, napag-alamang may dating mga kaso ng rape si Goloso sa mga lokal na korte.
