HATAW! D'yaryo ng Bayan hatawtabloid.com
MATAPOS tumakas mula nang maospital dahil sa coronavirus disease (CoVid-19), sinunog ng isang 85-anyos lolo ang social hall kung saan siya inilipat para i-quarantine sa Barangay Guiset Norte, sa bayan ng San Manuel, sa lalawigan ng Pangasinan, noong Linggo, 6 Setyembre.
Kinilala ang suspek na si Jacinto Delos Santos, residente sa Barangay Guiset Norte, sinabing gumawa ng sunog sa social hall na ginawang barangay quarantine facility matapos pagbawalan ng duty nurse na umalis ng pasilidad.
Nagsimula ang sunog dakong 2:00 pm bago nagresponde ang mga tauhan ng Bureau of Fire and Protection (BFP) na naapula ang apoy matapos ang 20 minuto.
Naunang dinala si Delos Santos sa Region 1 Medical Center (R1MC) sa lungsod ng Dagupan matapos magpositibo sa CoVid-19, ngunit tumakas, at sa hindi malamang dahilan ay nagpunta sa munisipyo ng San Manuel.
Agad ipinag-utos ni Mayor Kenneth Perez sa San Manuel Rural Health Unit na dalhin si Delos Santos sa local quarantine facility dahil hindi pa siya gumagaling sa sakit.
Hindi umano matiis ni Delos Santos ang pag-iisa at ginusto nang umalis sa barangay quarantine facility.
Kasalukuyang tinutukoy ang halaga ng pinsala ng quarantine facility dahil sa sunog.
