HATAW! D'yaryo ng Bayan hatawtabloid.com
DEPRESYON ang itinuturong dahil kung bakit uminom muna ng alak saka nagbigti ang 23-anyos na binata sa billboard sa Quezon City, nitong Lunes ng umaga.
Ang biktima ay kinilalang si Rey Erfe Seco, 23 anyos, binata, maintenance ng Mantego Ads, tubong Pangasinan at residente sa Katipunan Ave., Escopa 2, Quezon City.
Sa imbestigasyon ni P/CMSgt. Elizalde Toledo, ng Criminal Investigation and Detection Unit ng Quezon City Police District (CIDU-QCPD), dakong 8:00 am nitong 27 Enero nang maganap ang insidente sa billboard site na pag-aari ng Mantego Ads Corporation na matatagpuan sa kahabaan ng Katipunan Ave. corner Cinco Hermanos St., Escopa 2, QC.
Ayon sa nakasaksing si Joy Flores, 38 anyos, manikurista, nasa loob siya ng kanilang tahanan nang makarinig ng ingay mula sa labas.
Upang alamin kung bakit, lumabas siya sa bahay at nakita niya ang maraming tao na nakatingala at itinuturo ang mataas na billboard na nasa itaas ng kanilang barung-barong.
Pagkatingala ni Flores, nakita niya ang lalaking nakabigti sa billboard.
Mabilis na nagresponde ang SOCO team sa pamumuno ni P/Lt. Charibelle Jandoc at matapos maibaba ang bangkay ng biktima ay nakasamsam sila ng mga bote ng beer sa lugar.
(ALMAR DANGUILAN)
