Friday , March 29 2024

Sa Davao del Sur… Batang babae patay, 18 pa sugatan sa 6.9 magnitude lindol

ISANG 6-anyos batang babae ang iniulat na namatay habang 18 iba pa ang sugatan nang yanigin ng magnitude 6.9 lindol ang lalawigan ng Davao del Sur dakong 2:11 pm kahapon, 15 Disyembre.

Kinilala ang batang binawian ng buhay na si Cherbelchen Imgador, natamaan ng nahulog na debris nang hindi agad makalabas ng kanilang bahay sa Barangay Asi­nan, bayan ng Matanao, sa naturang lalawigan.

Kinompirma ng Davao del Sur Public Information Office ang pagkamatay ng bata ilang oras matapos yanigin ng tectonic earthquake ang lalawigan na naitalang ang sentro ay 6 kilometro hilagang kanluran ng bayan ng Padada at may lalim na 30 kilometro.

Matatandaang niya­nig din ng serye ng mala­lakas na lindol ang lugar noong Oktubre.

Gumuho ang dala­wang gusali sa bayan ng Padada – ang tatlong-palapag na Southern Trade commercial building at isa pang dalawang-palapag na gusali.

Pinangangambahang ilang mamimili at mga empleyado ang naipit sa Southern Trade.

Ayon kay Padada Vice Mayor Francisco Guerrero, nailigtas ang apat katao mula sa gumuhong gusali ngunit may iba pang naipit sa loob nito.

Gumuho rin ang isang water reservoir na dating mas mataas pa sa pamihilihang bayan.

Malubhang napinsala ang apat-na-palapag at tatlong-palapag na mga gusali sa Matanao National High School .

Ayon kay Engineer Luke Cadoyas, Padada town disaster risk reduc­tion and management officer, nagawa nilang mailigtas ang apat katao mula sa isang tindahan sa palengke kabilang ang isang senior citizen.

Bagaman hindi napin­sala sa serye ng mga lindol noong Oktubre, nagkaroon ngayon ng mga bitak sa mga kal­sad­ang patungo sa pa­lengke ng bayan ng Padada.

Agad nagresponde ang mga residente upang mailigtas ang ilang mga tinderang naipit sa natumbang pader.

Pinakamalakas na lindol ang tumama sa lugar kahapon kaya pinagdesisyonan ng mga awtoridad ang suspen­siyon ng mga klase at mga trabaho ngayong Lunes, 16 Disyembre upang ma-assess ng mga structural engineers at key building officials ang kabuuang pinsala sa mga gusali at para matiyak ang kaligtasan ng publiko.

Sa lungsod ng Davao naramdam ang lindol sa lakas na intensity 5. Pansamantalang isinara ang Mahayahay Bridge sa kahabaan ng Matina Pangi at Carlos P. Garcia roads dahil sa mga bitak na natuklasan matapos ang lindol na naging sanhi ng mabigat na trapiko.

Suspendido rin ang klase ngayong araw, 16 Disyembre sa lahat ng antas sa pampubliko at pribadong mga paaralan sa mga lungsod ng Davao at Digos City, mga bayan ng Padada at Magsaysay sa lalawigan ng Davao del Sur, at sa lungsod ng Kidapawan sa lalawigan ng Cotabato.

Sa lungsod ng Davao, sinabi ng mga lokal na opisyal na magbibigay daan ang suspensiyon sa mga engineer na masuri ang integridad ng mga estruktura at mga gusali.

Sa bayan ng Mag­saysay, kung saan naramdaman ang lindol sa lakas na intensity 7, tuluyang bumigay ang mga pader ng munisipyo nito na nauna nang napinsala ng mga nagdaang lindol.

Ayon kay Anthony Allada, information officer ng Magsaysay, may 14 kataong nasuga­tan ang nilapatan ng lunas.

Dagdag ni Allada, nagdeklara ng suspen­siyon ng trabaho sa munisipyo maliban sa mga key personnel nga­yong araw, 16 Disyembre.

Inianunsiyo ng National Grid Cor­po­ration of the Philippines (NGCP) na nananatiling normal ang power transmission services. Ang mga naiulat na blackout sa Magsaysay, Davao del Sur at sa lungsod ng Kidapawan ay maaring dulot ng pag­yanig.

Tiniyak ng Phivolcs na walang banta ng tidal wave sa Mindanao ang pinakahuling lindol.

HATAW News Team

Bilin ng Palasyo
sa publiko
KUMALMA PERO
MAGING HANDA

NANAWAGAN ang Palasyo sa publiko na manatiling kalmado kasunod ang magnitude 6.9 lindol na yumanig sa Mindanao kahapon.

Sinabi ni Presidential spokesman Salvador Panelo, kailangan maging alerto ang publiko sa mga inaasahang aftershocks.

Hinikayat ng Office of the President ang publiko na iwasang magkalat ng mga hindi beripikadong impormasyon na maaaring magdulot ng alarma at panic sa mga apektadong komunidad.

Tiniyak ng Palasyo na nakatutok ang gobyerno sa pamamagitan ng National Disaster Risk Reduction and Manage­ment Council (NDRRMC) at Phivolcs para bantayan ang sitwasyon sa Davao del Sur.

Ipinag-utos na rin aniya sa lahat ng ahensiya ng gobyerno na magres­ponde at ibigay ang mga pangangailangan sa mga apektadong lugar.

Kinompirma ni Panelo na nasa kanyang bahay sa Davao City si Pangulong Rodrigo Duterte nang lumindol.

Kasama aniya ng pangulo sa bahay ang anak na si Kitty habang ang partner na si Honeylet Avanceña ay nasa daan pauwi nang yumanig ang lindol.

Tiniyak ni Panelo na maayos ang kondisyon at walang nasaktan sa pamilya Duterte.

Kaugnay nito, sinabi ni Brig. Gen. Jose Eriel Niembra, commander ng Presidential Security Group (PSG), na walang naitalang sira sa bahay ng Pangulo.

Gayonman, sinusuri pa rin aniya ang struc­tural integrity nito.

(ROSE NOVENARIO)

About hataw tabloid

Check Also

Notoryus na wanted holdaper sa NCR, todas sa enkwentro sa Batangas!

Notoryus na wanted holdaper sa NCR, todas sa enkwentro sa Batangas!

NASAWI ang isang lalaki na tinaguriang kilabot na holdaper at akyat bahay na kabilang sa …

Las Piñas Mass Wedding Kasalang Bayan

Sa ika-27 anibersaryo ng Las Piñas
102 COUPLES SABAY-SABAY NA IKINASAL

SA PAGDIRIWANG ng Buwan ng Kababaihan at ika-27 anibersaryo ng pagkakatatag bilang lungsod ang Las …

Buhain Richard Bachmann

Buhain, umayuda sa HB Bills para sa PH Sports

Pinangunahan ni Batangas 1st District Congressman Eric Buhain ang pagtalakay at pagsuri sa mga isinusulong …

Acuzar mapang-asar KALBARYO NG MARALITA ITINANGHAL SA NHA, DHSUG, PANAGHOY IWINASIWAS NG GRUPONG URBAN POOR

Acuzar mapang-asar  
KALBARYO NG MARALITA ITINANGHAL SA NHA, DHSUG, PANAGHOY IWINASIWAS NG GRUPONG URBAN POOR

MAHIGIT 300 informal settler families (ISFs) at civil society organizations (CSOs) ang nagtanghal ng Kalbaryo …

PNVF Volleyball

Philippine National Volleyball Federation (PNVF) Under-18 Championship 2024

MAGSISIMULA ang Philippine National Volleyball Federation (PNVF) Under-18 Championship 2024 ngayong linggo simula sa Biyernes …

Leave a Reply

Your email address will not be published. Required fields are marked *