HINDI kabado ang Palasyo kahit magkaroon ng access sa intelligence report si Vice President Leni Robredo bilang drug czar.
Ayon kay Presidential Spokesman Salvador Panelo, wala namang itinatago ang gobyerno sa mga record at nakabukas ito sa publiko.
“Unang-una wala namang itinatago ang gobyerno sa mga record, nakabukas naman ‘yan. ‘Yung intelligence report na sinasabi wala rin masama doon dahil ‘pag sinabi mong intelligenece report sino ang mga involved sa droga ang nandoon at iyon naman ang sinusundan ng laban ng ahensiya. So anong masama naman doon?” pahayag ni Panelo.
Bukas din aniya ang palasyo sa balak ni Robredo na makipag-ugnayan sa US Embassy at sa United Nations para sa intelligence gatherings.
Mas makabubuting bigyan muna aniya ng tsansa si Robredo na makagawa ng sariling diskarte.
“Hayaan natin si VP Leni as the drug czar na gumawa ng kanyang diskarte. Hindi pupuwede kasi ‘yung maraming quarter backers, maraming netpickers, maraming haka-haka, maraming mga espekulasyon. Hayaan muna natin na magtrabaho ‘yung ale. Pabayaan natin, suportahan natin,” giit ni Panelo.
ni ROSE NOVENARIO
VP LENI HAYAANG
MAMUNO SA WAR ON DRUGS
— SOLON
SA KABILA ng mga pangamba ng oposisyon laban sa pagtangap ni Vice President Leni Robredo sa posisyon bilang co-chair ng Inter-Agency Committee on Anti-Illegal Drugs (ICAD), isang kongresista ng administrasyon ang nanawagang bigyan si Robredo ng panahon upang ipakita ang kanyang kakayahan.
Ayon kay Cavite Rep. Elpidio Barzaga Jr., nararapat bigyang tsansa si Robredo na ipakita ang kanyang kakayahang baguhin ang patakaran ng gobyerno sa paglaban sa ilegal na droga.
“Let us give the Vice President a chance to prove whether or not na kaya niya, kaya nga sabi ngayon ng ating Pangulo, through his spokesperson, e bigyan natin ng leeway ang ating Bise Presidente to prove her worth,” ani Barzaga sa interbyu sa radio dzBB.
Ani Barzaga, presidente ng National Unity Party (NUP), ‘yung mga nagsasabing sine-set-up si Robredo ng administrasyon upang hindi magtagumpay ay masyadong “pessimistic.”
“To us politicians, that is a very good sign sapagkat nagkakaisa ang ating Pangulo at Bise Presidente sa pagsugpo ng unang sakit ng ating lipunan, the drug problem at kung minsan nababasa nga natin sa dyaryo (that) this is just a trap coming from the administration, minsan sinasabi rin natin it was a wrong decision on the part of the Vice President, minsan sinasabi rin natin that the President and his men were not in good faith pero I think this would be a pessimistic or a negative attitude,” aniya.
Ani Robredo, nararapat anang palitan ang kampanyang “Oplan: Tokhang” dahil hindi na maganda ang paningin ng tao rito.
Ayaw din ni Robredo na may mga namamatay sa kampanya laban sa droga partikular ang extrajudicial killings.
Ani Barzaga, ang suporta ng taong bayan ay kailangan ni Robredo dahil ang tagumpay nito ay tagumpay ng sambayanang Filipino.
“And in the same vein, the failure of this program will be a failure not only on the part of the President and Vice President but a failure on the part of the Filipin nation. Nakikita natin ang masamang epekto ng droga sa lahat ng mamamayan sa bansa,” saad ng mambabatas.
Dagdag ni Barzaga, kailangan din ng suporta ng Kamara para bigyan ang ICAD ng karagdagang pondo para sa operasyon nito.
Pati na ang suporta ng Hudikatura ay kailangan sa paglilitis ng mga kaso ng mga taong may kaugnayan sa sindikato ng droga.
“Sapagakat kung minsan, nawawala at nasasayang ang efforts ng ating law enforcement agencies kung ‘yun namang mga involved sa droga na-a-acquit o kung minsan, convicted, pero nakalalabas naman sa Muntinlupa,” ani Barzaga.
(GERRY BALDO)