TINIYAK ni Gabby Concepcion na tuloy na tuloy na ang reunion movie nila ni Sharon Cuneta.
Inihayag ito ni Gabby kamakailan sa paglulunsad sa kanya bilang pinakabagong ambassador ng Beautederm.
Aniya, nagkausap sila ng masinsinan ni Sharon sa isang event at napagkasunduang ituloy ang naudlot na reunion movie.
“Nag-usap kami na kaming dalawa lang at nagkapaliwanagan. Schedule lang talaga namin ang hindi magka-ayos pero inayos na namin,” pagbabahagi ni Gabby.
“Hinihintay na lang namin na matapos ang mga show niya,” dagdag pa ng aktor.
Sinabi pa ni Gabby na siya man ay gusto ring ayusin ang anumang gusot nila ng aktres.
“Ngayon, nakapag-usap na kami ng kami lang dalawa, wala ng iba, kaya nabuo ang plano namin at sana matuloy,” giit pa ni Gabby.
Sinabi pa ni Gabby na welcome sa kanya ang sinumang producer na gusto silang gawan ng pelikula. ”Basta may magandang materyal bakit ba hindi,” aniya pa.
Balitang isa si Kris Aquino sa nagpahayag noon na gustong i-produce sila ng pelikula. Kaya kung walang magiging problema, posibleng masundan agad ang reunion movie nina Sharon at Gabby.
Huling nagsama sina Sharon at Gabby noong 1992 sa Tayong Dalawa.
SHOWBIZ KONEK
ni Maricris Valdez Nicasio
