ISANG babaeng naghahanap ng mauupahang bahay ang naging biktima ng panggagahasa matapos sumama sa mister na nag-alok ng matitirahan sa Valenzuela City, kamakalawa ng hapon.
Sa ulat ng pulisya, nakikipag-inuman sa isang kaibigang babae ang biktimang itinago sa pangalang Sabel, nasa hustong gulang, sa Tatalon St., dakong 3:00 pm nang dumating at makitagay sa kanila ang suspek na si Roberto Abalos, 50 anyos, residente sa Villanueva Compound, Brgy. Ugong ng nasabing lungsod.
Napag-alaman ni Abalos na naghahanap ng mauupahang apartment ang biktima kaya’t inalok na sa kanyang tirahan muna tumuloy hangga’t hindi pa nakahahanap ng matitirahan na pinagkatiwalaan naman ng babae.
Pagdating nila sa bahay at ng nasa loob na, nagulat ang biktima nang ikandado ng suspek ang pintuan bago kumuha ng kitchen knife at puwersahan siyang kinaladkad papasok sa silid habang nakatutok ang patalim.
Sa pamamagitan ng pananakot, puwersahan niyang nahubad ang kasuotan ng babae hanggang magtagumpay na maisakatuparan ang makamundong pagnanasa sa babae.
Nagawang makatakas ng biktima at humingi ng tulong sa mga tauhan ng Valenzuela Police Community Precinct (PCP) na nagresulta sa pagkakadakip sa suspek na ngayon ay nahaharap sa kasong panggagahasa.
(ROMMEL SALES)
