HATAW! D'yaryo ng Bayan hatawtabloid.com
NGAYONG araw ay muli tayong maghahalal ng ating mga mambabatas, sa Mataas at Mababang Kapulungan sa Kongreso.
Ihahalal din natin ang mga lokal na pinuno ng bayan.
Tayo ang higit na nakakikilala sa kanila kaya dapat lang na maging matalino tayo sa pakikitungo at pagpapasya.
Huwag tayong magbakasakali, matututo tayong pumili gamit ang ating matalinong pagpapasya.
Sa lokal, piliin ang mga tunay na nagtatrabaho sa ikauunlad ng ating lungsod at bayan.
Ibig sabihin, kung sino ang may pruweba ng tunay na aksiyon at pagmamalasakit, at nagpaunlad ng bayan, ‘yun na po ang piliin.
Sa mga senador, sana lang po ay pumili na tayo ng mga bago, huwag trapo, lalong huwag mandorobo.
May kasabihan, “fool me once, shame on you; fool me twice shame on me.”
Sa totoo lang, hindi lang naman tayo dalawang beses naloloko nitong mga ‘trapo’ at mandorobo, maraming beses na.
Huwag din po bomoto ng mga grandstanding, puro pambobola lang ang alam niyan.
Mayroon din naman pong mga batikan na mambabatas, pero dapat ‘yung walang bahid — i-sergs n’yo ‘yan, este i-search n’yo ‘yan.
‘Yung laging #1 hindi dahil sa survey kundi sa totoong programa at serbisyo, isulat po ninyo ‘yan.
Huwag pong maniwala sa mga nagsasabing makakalikasan sila pero malaking porsiyento yata ng lupang agrikultura sa bansa ay sila na ang may-ari. Pati tubig gusto kanila rin. Baka bukas makalawa pati hangin ay sila na rin ang may-ari at bibilhin na rin natin per metro.
Huwag pong iboto ang matatakaw na sa kapangyarihan, matakaw pa sa likas na yaman ng bansa.
Uulitin lang po ng inyong lingkod, ‘yung mga bago ang piliin.
Iba naman!
LUTO ANG ELEKSIYON
SA TAGKAWAYAN, QUEZON,
(ATTN: GEN ALBAYALDE)
GOOD day sir Jerry Yap, reklamo lang po namin ngayong eleksiyon, parang ‘martial law’ na po. Ang PNP-HPG ay nagte-checkpoint sa loob ng mga kalsada imbes sa main roads lamang at kapag nasita ay agad na tanong ay kung kaninong partido. ‘Pag sa kalaban ng Eleazar ay butas ng karayom ang lulusutan ng isang rider dahil sa higpit ng paghahanap ng violations kuno ng mga mamang pulis. Sa pagkakaalam po namin ay hindi naman ito kabilang sa election hotspot sa Region 4. Sadyang sobrang higpit na dahil may kaanak na heneral ang batas na bakal na mayoralty candidate dito sa aming lugar. Nananawagan po kami kay PNP Chief Albayalde sir. Ang hinuli nila dati ay parang nautusan lamang para uminit ang eleksiyon dito upang humigpit ang sandamakmak na full force personnel. Lahat ng kandidato ay namigay rin naman, pwe!
Para sa mga reaksiyon, suhestiyon, reklamo at sumbong, magtext sa 0977.705.22.31 o mag-email sa [email protected] Para sa mga nakaraang isyu ng BULABUGIN please visit https://hatawtabloid.com
BULABUGIN
ni Jerry Yap
